Aas hai

Apne aashiyaanon ko kosta jaaye
Naye jahaan dhoondhta jaaye
Zameen se door bhaagta jaaye
Sawaalon ke ghere se bachta jaaye
Man yeh bavra udta jaaye
Khud se ladke haarta jaaye

Chand ki aas mein aasman chedta jaaye
Taaron ki chamak chod daag mangta jaaye
Din mein chaand chahta jaaye
Baadolon se ladte dhoop jhelta jaaye
Man yeh bavra udta jaaye
Apni chahaton ko boojhta jaaye

Kabhi Apni raftar se haar manta jaaye
Kabhi Pairon ki tezi ko haraata jaaye
Sukoon ki talaash mein bhatakta jaaye
Na milne par bechain, atakta jaaye
Man yeh bavra udta jaaye
Ruk ruk ke phir chalta jaaye

Aankhon ko pardon se dhakta jaaye
Din - raat mein fark bhoolta jaaaye
Bhatke jugnu ki tarah timtimata jaaye
Ujaale mein apni roshni jalaata jaaye
Man yeh bavra udta jaaye
Raaton ko andhera karta jaaye

Aas hai...
ke sawaalon ki rihaayi hogi
chahton ki vidaayi hogi
man saath raftar milayega
raat jalegi ; din bujhega